منتديات أبودليق
أخي الحبـيب ... الزائر الكريم ... حبابك عشرة بلا كشرة تفضـل بـدخـول دارك فعز الله مقدارك ولك من إدارة المنتدى ومن كل أهل أبودليق الطيبين التحية والتقدير فأنت من تساهم برفعة أبودليق والإعلاء من شأنها نتمنى لك وقتا سعـيداً بين أهلك وأخوانك ــ تفضل بالدخول ــ فلا تنسى نطق الشهادتين والصلاة على النبي :
(( لا إله إلا الله محمد رسول الله ))
(اللهم صلي على سيدنا محمد وعلى آله وصحبه وسلم)

هل يمكن تجد بعير بهذا الوصف حاج الماحى

اذهب الى الأسفل

هل يمكن تجد بعير بهذا الوصف حاج الماحى

مُساهمة من طرف ودالشيخ نعيم ابلتيبه في الإثنين 11 يونيو 2012 - 10:35

والله لو قالوا ليك اعيد وصف هذا الجمل لن تستطيع...
بسم الله الرحمن الرحيم
قالو الحجيج قطع طالب نور البقع
قلبى زاد وجع حماني القيد منـع
************
العبدُ قام شرع متقاصر ما بتع
جاب العسل نقع كباه فى القـــرع
ديوانه اجتمع أسقى لأهل السمع
مجذوبهم تف وقع كالمغشي الإنصرع
فى الدنيا ارتفع والاخرة نال شفع
قلبي زاد وجع حماني القيد منع
****
ثاني القصيد رجع فوق بهجة البقع
قمر القسوم طلع الضوا ما انقطع
فى العرش لاح سطع الذاكر ما اضجع
يوم النهار صقع لولاه نروح جرع
قلبى زاد وجع حمانى القيد منـــــع
****
العالي في القدر ذو العز والفخر
لو طول ولو قصر لو غليد ولو نسر
فى حقه الصبر حين ينزل الامر
شفيعنا فى الحشر ليلة عرقنا يخر
التبعك لي الختر والخالف من حاله كر
قلبى زاد و جع حمانى القيد منع
****
دقوا النحاس ردف جا صاحب الوظف
ركب الصديق وقف اتيامن وحــــلف
معلوم بهدم الصف ما بعاين الطرف
مابخلى الدم يجف رقدهم كالعلف
والعوق من عنده رف
قبض الملوك عنف كدى جرَّ الكي خلف
قلبى زاد وجع حماني القيد مــــــــنع
****
دقوا النحاس ضرب جا صاحب الادب
فاروق الاحتسب القام للدين نصـب
سل سيفه المو كعب يغرز فى الدرعين جب
السيمت اب هجب من عنده قام هـرب
رسلهم بالسلب للهاشمى العجب
قلبي زاد وجع حماني القيد منع
****
يا فمي قول السي للنسبو من امي
فارسا بريد الدي ضربه النجيض مو ني
سيفه الما بفضل شيء الدبرة الفيها
الغي شقاها وخلف الكـــــــــــــــــي
نصر القديم الحي زوج ام كلثوم و رقي
قلبي زاد وجع حماني القيد منـــع
****
دقوا النحاس ورز ركب المضرغم هز
دخل المداين جز خلا الرمم كالبز
فى الارض ماهن نز كل المشركن فز
ود عمه الليل برز نصر اب علامة وعــز
قلبي زاد وجع حماني القيد منع
**********
يا حي يا مجيد
ندعوك الفين جمل على المشهاد والايد
ميتين للمويـــه والزاد نجفى البليد
ميتين لاحبابنا الجمبي والبعيد
ميتين للفقرا البقروا فى المســـيد
جملى البدورو ما اظنو يتوجد
ابيض فى لونه وعلى الدبلان يزيـــد
افطس قدومو قلما مبري بي الليد
ورهاف آنافو تام شوفو بي تاكيد
سمحات عيونو ختما دق ود تبيــد
شارفات اذنيه مكلوفا يا الرشيد
زمامه الفضه اربع تاواق ويزيـــــــد
خناقو الشولق غشيم دهب العبيد
رسنو حريرا بارد لي مسك الايـــــــــــد
ان قلت رقبتو كالروقه الفي الهويد
مكوكب زورو والفدعة العند الايــــــد
ضامر حشاهو ماهوالبدين عريض
مرخي عرقوبو شوتال مدقوق جديد
سمحات سيقانو كا ليد المن حديـــد
مدور خفه فى الوطية مو عريض
شارف سنامو قبة سيدى العبيـــــد
إن قلت ذنبو فوق الشبرين ما بزيد
طبعو المؤدب لو عاصي لو عنــــيد
كدى جيبو و نوخو يا المرضي ويا العبيـد
سو فوقو سرجا مكسي محشي جديد
ان قلت مجدولا كالفصل الفى العقيــــد
أفرش لي الفروة يا تويلى يا برعيد
قام تبَّ بينا يضرب و ينفض الايـــــد
ان جاك ماشي كيف عفرت الصـعيد
يا اخوي أبراهو من كونك ماك جديد
خنق للطاره طالب الرسول الســـيد
ريس السفينة قال اهلا مداح الســــــيد
بلاش ادخلوا ان شاء الله توافوا العيد
ودخلنا فيها كدي قلنا يا مجـــــــيد
فى سروة واحدة وصلت بقدرة السيد
فى جدة خروجنا مافينا من مريض
وحلقنا شعورنا ورجمنا خصم السيد
طاري المنارة ام شبكا من حديـــــد
قلنا له سلاما يا سيد رسالة اب زيد
قال اهلا مرحب انا قلبى ليك بريـــــد
انت واحبابك الجمبي والبعيد
تسكنو قصورا شامخات بلا تحديـــد
يات من كان منكم الفين حورية نهيد
وا عيب الراوي الما رتل وقال قصيد
يوم لمت الوعيد يضمننا النبي السيد
قلبي زاد وجع حماني القيد منـــع
****
احمد عليك قصد فى مدحه ما اجتهد
كان دايح بالبلد لا اطامن لا قعـــــد
لا صام ولا عبد لا انفق قليلا عد
القبر الفوقو السد بيك أسلم ما أنشــــد
قلبي زاد وجع حماني القيد منع
*********
صليت على العدل فى شرعه ما زغل
ما صب سحاب نزل كب ماهو وانهمل
والنبت الفي السهل عد علم اللم يزل
تدخل له في ام قلل وتواجهه غير عــــلل
قلبي زاد وجع حماني القيد منع

ولكم منى اجزل الشكر والاحترام

ودالشيخ نعيم ابلتيبه
وسام الأوفياء
وسام الأوفياء

عدد المساهمات : 112
تاريخ التسجيل : 04/01/2011
الموقع : السودان ـ الخرطوم ـ الجريف شرق حي القادسية

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى