شريحة العاشق

يقال والعهدة على الراوي الذي ليس مهما أن تصدقه ، أن نجاراً عجوزاً كان يعمل في صناعة المراكب على شاطئ أبوروف بأم درمان ، وبينما هو منهمك في عمله ، سقط منه (المنشار) في النهر فجلس يبكي على ضياعه ، وكانت هناك (جنية شقراء) تراقبه ، (غالباً كانت قاعدة قريب من سوق الطلح العجيب داك) ، فحضرت إليه الجنية وسألته : ( الببكيك شنو يا عمو ؟ ) . قال النجار في هلع : (منشاري وقع في البحر ، بعدين إنتي منو يا بتي؟) لم ترد عليه الجنية الجميلة الشقراء ، بل غطست في النهر وخرجت بمنشار من ذهب وسألته : (دا منشارك يا عمو ؟ ) . قال النجار : ( لا ، ما منشاري .. !!) .
فغطست الجنية مرة ثانية وخرجت بمنشار من فضة وسألته : ( ياهو دا يا عمو ؟ ) . قال النجار دون تردد : ( برضو لا ، ما حقي ) .. !! ثم غطست الجنسية مرة ثالثة وخرجت بمنشار من برونز وسألته : (أكيد دا منشارك) . رد عليها النجار : لا ... . لم تيأس الجنية بشعرها الأشقر المبتل وحبيبات الماء تنزلق على تضاريسها الجاحظة ، فغطست مرة أخرى وخرجت بمنشاره الحديدي (الشين) وسألته : ( ياهو ده يا عمو ، مش ؟ ) .
قال : نعم ، وقد ارتسمت السعادة عليه لحصوله على منشاره ، فقامت الجنية الجميلة الشقراء بإهدائه المنشار الذهبي والفضي والبرونزي لأمانته وصدقه ...
مرت الأيام والليالي ، وجاء يوم (كثير الغيوم كثير المطر) ، وإذا بذات الرجل وهو (كان قاعد يتفسح) مع زوجته على شاطئ النيل ، فإنزلقت قدمها وسقطت في النهر ، فجلس التاجر يبكي فحضرت ذات الجنية الشقراء وسألته : (الببكيك شنو يا عمو ؟ ، برضو منشارك تاني وقع؟ ) . قال : (أبداً ، أم أولادي وقعت في الموية ) .
فغطست الجنية وخرجت تحمل من جوف الماء (هيفاء وهبي شخصياً) وسألته : ( دي ياها مرتك يا عمو النجار ؟) . قال النجار دون أن يهتز له جفن أو (قسيمة) أو حتى (عُشرة الأيام) : (آآآي والله يا بتي ، يا ها زاتا مرتي الوقعت مني ) .. قطبت الجنية الشقراء جبينها وقالت : (كضاب يا عمو ، ليه داير تغشني ؟ ) رد الرجل في مسكنة ودهاء : (كضب شنو يا بتي ، أنا خفت أقول ليكي ما ياها . تقومي تغطسي تاني تجيبي لي "أليسا" ، ولو قلنا ليكي برضو ما ياها ، تغطسي تجيبي لي "نانسي عجرم" ، ولو قلت ليكي ما ياها ، تغطسي تاني تيجبي لي مرتي (الجد جد) ، ولو قلنا ليكي (ياها تب) ، تقومي تهديني (هيفاء) و(أليسا) و(نانسي) ، وأنا راجل عجوز ما بقدر علي الدواهي دي كلها ، قلنا نشيل (هيفاء) ونمشي ، وربنا يسهل علينا وعليكي ، وعلى التماسيح الحتاكل مرتي) ...!!!