مجموعة جديدة 10

عنوان المقال : ( السياسة عندهم وعندنا )
هنالك أقوال كثيرة عن السياسة .. تعالوا نقرأ ما قالوه عن السياسة (عندهم) والسياسة (عندنا) :
• السياسي المحافظ هو عبارة عن رجل يجلس ويفكر، وغالباً يجلس فقط. – وودرو ويلسون
• عندنا (ولا يجلس ذاااتو… نايم على طول) !
• السياسي المحافظ هو رجل لديه ساقان جيدتان تماماً لكن لا يتعلم أبداً كيف يسير إلى الأمام. – فرانكلين د. روزفيلت
• عندنا (ولا للخلف .. بس مكانك سر)
• بما أن رجل السياسة لا يصدق أبدا ما يقوله، فإنه يفاجأ إذا ما صدقه أحد. – شارل ديغول
• عندنا (روحو ذاااتا ما بصدقا)
• إذا كانت العربة هي السياسة والحصان هو الاقتصاد، فيجب وضع الحصان أمام العربة. – محمد بن راشد آل مكتوم
• عندنا ( مش لمن يكون عندنا حصان)
• تتطلب الديمقراطية الصحيحة مجتمعاً لائقاً، كما أنها تقتضي منا أن نكون شرفاء وكرماء ومتسامحين ومحترمين. – تشارلز و. بيكيرنغ
• عندنا (تتطلب الديمقراطية حل كل الأحزاب الموجودة)
• السياسي المتحرر هو رجل أو امرأة أو طفل يتطلع قدماً إلى يوم أفضل وليلة هانئة ومستقبل مشرق لا حدود له. – ليونارد بيرنشتاين
• عندنا (يظهر معندناش سياسي متحرر)
• إن السياسي الجيد هو ذاك الذي يمتلك القدرة على التنبؤ، والقدرة ذاتها على تبرير لماذا لم تتحقق نبؤته. – ونستون تشرشل
• عندنا (على السيد وزير التجارة أن يستعد لتبرير نبؤته بأن سعر الخراف سيكون 450 جنيها) ده بإفتراض أنه سياسي جيد (طبعن)
• السياسة هي علم الأحياء التطبيقي. – إرنست هيكِل
• عندنا (هي علم الموت الأكلينيكي)
• سيفعل السياسي أي شيء للحفاظ على وظيفته، حتى لو اضطر لأن يصبح وطنياً. – ويليام رونالدولف
• عندنا (يا جماعة الخواجة ده سوداني؟)
• السياسة هي حرب من أجل مبدأ نبيل يشرف الأمة. – ألبرت بايك
• عندنا (يقرف الأمة)
• السياسة الداخلية قد تخذلنا ليس إلا، أما السياسة الخارجية فبإمكانها قتلنا. – جون كنيدي
• عندنا (بتكتلنا الداخلية) !
• رجل السياسة الحق هو ذلك الذي على استعداد للمخاطرة. – شارل ديغول
• عندنا (الإستعداد للمفاصلة)
• فن السياسة يتضمن أن تعرف بدقة متى يكون ضروريا أن تضرب خصما تحت الحزام بقليل. – كونراد أديناور
• عندنا (فوق الحزام بكثير) !
• السياسة فن منع الناس من التدخل فيما يخصهم. – بول فاليري
• عندنا (ده الحاصل الخواجة ده كان معانا وللا شنو؟)
كسرة :
عندهم السياسة العمل بها ليس مهنة وخمسة .. عندنا مهنة ونص وخمسة .. شفتوا ليكم رئيس حزب عندنا (شغال)؟ ما كووولهم قاعدين ساااااكت !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( بنك الخروف )

لأن إقتصاد البلد يسير نحو الخلف بخطى متسارعة (ما عارفين وادانا وين؟) كان لابد أن تصبح مسألة شراء المواطن لخروف الأضحية مشكلة تستفحل عاماً بعد عام حيث أصبح (البيان) الذي تصدره (هيئة علماء السودان) عند إقتراب العيد والذي هو من قبيل رفع الحرج والإحراج عن ما آل إليه حال البلاد والعباد (في ظل المشروع الحضاري) والذي تشرح فيه للمواطنين جواز (الإستدانة) و(الأقساط) والما عارف أيه .. أصبح هذا البيان شيئاً مملاً ومكرراً يحفظه حتى الأطفال .
علماؤنا الأماجد يفتتحون (بيانهم السنوي هذا) بجواز الإستدانة ويختتمونه بأن الأضحية لا تجب على من لا يستطيع شراءها وكان الأجدر ان تكون الآية معكوسة بحيث يستفتحون البيان بعدم الوجوب ويختتمونه بجواز الإستدانة علماً بان من يستدين هو الفقير الذي لا يستطيع شراءها ولكن يبدو أنه فقه (المخارجة) و (المداهنة) !
طالما إنو مسألة عدم المقدرة على شراء الخروف دي بتتكرر كل عام بالنسبة لكل (أهلنا الغبش) فالعبدلله عندو فكرة جهنمية تريح العلماء من (الفتاوى) السنوية (المدغمسة) كما تريح المواطنين كم هذا العبء الثقيل والفكرة نهديها إلى (حكومتنا الرشيدة) وهي إنشاء (بنك الخروف) .. حيث يقوم المواطن بالتسجيل والإشتراك في هذا البنك مع إعطاء رقم موبايله الذي سوف يحول منه الرصيد (واحد جنيه يومياً) لأرقام البنك التى يعلن عنها ، يقوم البنك بتشغيل ما يتلقاه من أموال المشتركين خلال العام ثم عندما تقترب (الأضحية) يتم توزيع الأرباح إضافة إلى مبلغ الـ 360 جنيه (تقريباً) الذي قام المواطن بدفعه وبذلك يستطيع المواطن أن (يضحي) !! وأن ترتاح هيئة علماء السودان من إصدار تلك الفتوى السنوية (البائسة) .
من مميزات هذه الفكرة إنو مبلغ جنيه يومياً ممكن (مجازفتو) بسهولة وممكن كمان لو وقعت في أيدك عشرة عشرين جنيه ما محتاج ليهم ترسلهم (للبنك) وترتاح ليك كم يوم كده .. وكمان ميزة تانية هي إنو القائمين على أمر (بنك الخروف) سوف يقومون بالشراء بالجملة وأكيد الأسعار ح تكون أقل ، وميزة تالتة هي إنو ممكن الأرباح (لو القروش إشتغلت كويس) تكون أكبر من تمن الخروف وعلى كده تضمن تطلع حق الزيت والفحم والبهارات والرغيف والضباح ذاااتو.
على ذات نهج (بنك الخروف) يمكن إنشاء (بنك التعليم) للإيفاء بأقساط المدارس والجامعات وبنك (إيجار البيت) عشان ما يجدعوا ليك عفشك في الشارع وبنك (الدواء) عشان تشتري كوتة الأدوية المزمنة سنويا خاصة والأدوية بقت كل يوم أسعارا بتزيد وبنك (الخريف) لعمل الترميمات قبل الخريف وبرضو ممكن (بنك الزواج) على الأقل تقدر تطلع حق (تصوير الفيديو) وبنك (النفاس) عشان تقدر تدفع (حق الدايات) وكده وبنك (الطهور) عشان تقدر تطهر الأولاد .. بس المشكلة إنو لو المواطن إشترك في البنوك الفوق دي كوووولها عاوز ليهو يومياً خمسين جنيه تحويل رصيد !! عشان كده خلونا هسه في (بنك الخروف) ده !
ولو الفكرة عجبت (أمنا الحكومة) حقو تبدأ في تنفيذها بعد العيد طوالي وتقوم بتسجيل البنك وتعيين أعضاء مجلس الإدارة والمدير العام ونواب المدير العام ومدراء الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات… وكان السنة الجاية (ضحيتو) دي دقني .. !!
كسرة :
نحنا عاوزين لينا بنك (للصبر) !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( مهندس نفط وإيسكريم )
السلام عليكم يا أستاذنا ..أنا شاب سوداني من أسرة بسيطة تسكن مدينة بحرى قريت فى مدرسة بحرى النموذجية و منها دخلت كلية (هندسة و تكنلوجيا النفط) وهسي مهندس نفط ليا أكتر من سنة … لما دخلتا الجامعة كنتا متخيل إنى حاشبع رغبتى و إهتماتى بالكيمياء و المعادن والنفط والحاجات دي بس إنصدمتا بى واقع إنو الجامعة بتدرسنا مقررات من زمن ( حفروا البحر) الشئ الخلاني أقرأ براي عشان أواكب وأسد النقص الأكاديمي خاصة وإني طالب نشيط فى مجالات دراستى وما شغال ليك بالسياسة شغلة يعني ما كان عندى أى إنتماء سياسي كنتا بعمل معارض فى مجال النفط وبأقوم بتنظيم ورش و محاضرات من مهندسين كبار عشان نغطى الفجوة بين المادة العلمية الضارباها الانيميا و الحياة العملية فى الحقل
خلال سنوات الدراسة في الجامعة و تحديداً في عام م٢٠١٠ تم ترشيحي لأمثل السودان فى مؤتمر عالمي للبترول خارج السودان بى مشروع فى (الصناعة النفطية) فقدمتا للمؤتمر المقترح بتاع المشروع و وافقو بيهووإتكفلوا بى أى حاجة من تذاكر لى فندق لى فيزا.. لى شلاقتى قمتا إخترتا مشروع مهمل فى مجال البترول اللى هو(إنعدام المسؤلية الإجتماعية فى مجال الصناعة النفطية السوداينة) اللى هيا أهم صناعة .. و الله يا استاذ زول فهم العنوان مافي! .. الا راسلتا الشركات البره و أدتنى أنظمة من أنغولا و الإكوادور و الأمارات و الكويت حتين قدرتا أتم المشروع بتاعى و الحمد لله و سافرتا عرضتو بره و جيت و زول ركز معاى مافي .
فى السنة الاخيرة عملتا مشروع تخرج أكتر من ممتاز فى ٤ أبار مع شركة فرنسية بس للأسف لجنة مناقشة المشاريع المكونة من دكاترة الجامعة ما إتناقشو معاى فى المشاكل الأنا ناقشتها فى المشروع و الحلول الطرحتا بل ناقشونى فى (العنوان الجانبى دا خطو كم؟) و(الصفحة دي ليه ما عامل ليها جستفاى) و (العنوان الجانبي ده ليه ما تحتو خط ؟)
الحمد لله يا أستاذ إتخرجنا و دخلنا حياة العطالة و دخلنا فى دوامة التقديمات و الوظايف و نفتش مكان نقضى فيهو الخدمة الوطنية ! اها هسى بعد سنة من التخريج الوضع كالاتى:
- الزول العندو واسطة نزل الخدمة فى وزارة وللا شركة من الشركات .
- الزول الما عندو واسطة زينا كدا يا مباري الضلله يا ببيع فى بقالة وللا إشتغل بتاع هدف او خش السوق يبيع مسامير!!
- الزول الكان فى الجامعة تبع الاتحاد وقاعد يسك الناس بى (السيخ و الملتوف)هسى إتوظف فى أحسن شركة بترول سودانية!!
- الزول الكان مبارى (الكيزان) و مربت ٥ سنين هسى إتوظف بى أحسن راتب!!
أما أنا يا أستاذ فأنسانى .. فتشتا على أى شغل و فى أى مكان لما الاسبوع الفات دخلتا معاينة فى شركة بعيدة كل البعد عن مجالى وبعد ما خلصتا المعاينة قام ممثل( الموادر البشرية) قال لى بالنص: (بالنيابة عن اى زول ما مقدر مؤهلاتك وخلاك تصل لى مرحلة إنك تقدم لى شركتنا دى نحنا مقدرينك وبنشكرك على الاجتهادات بتاعك) !
ملحوظة : انا هسى ببيع ايسكريم فى مطعم و اى زول بحكى ليهو حكايتي ما بصدق!
(إبنك حسين)
كسرة :
يا ناس (وزارة النفط) ما عندكم تلاجة إيسكريم تشغلوا لينا فيها ولدنا ده ؟ إن شاء الله مهندس نفط وإيسكريم !!
كسرة ثابتة :
أخبار ملف هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( أقول ليهو شنو؟ )
لنفترض أن أحد (الأجانب) وهو يزور بلادنا سألنى واحد من الأسئلة التالية .. أقول ليهو شنو؟
• لماذا يشتغل المسؤولون بالأعمال الخاصة بينما الإسلام والدستور (ذاااتو) يمنع إشتغال المسئولين بالأعمال الخاصة .. أقول ليهو شنو؟
• لديكم الماء والأرض الخصبة الشاسعة ولكنكم تستوردون الغذاء من الخارج .. أقول ليهو شنو؟
• أولاد زعماء المعارضة لديكم مستشارين في الحكومة … ممكن تفهمني الحكاية دي كيف؟ .. أقول ليهو شنو؟
• لماذا لا يبت في قضايا النهب المصلح لديكم بينما يبت سريعاً في قضايا السرقات المنزلية وأنتم دولة إسلامية .. أقول ليهو شنو؟
• كل الدول في العالم نجد أن الدولة توفر المواصلات الدخلية للمواطنين .. بصات .. ترام .. مترو .. لماذا لا تقوم حكومتكم بتوفير المواصلات للمواطنين .. أقول ليهو شنو؟
• لماذا تقتصرون الحدود في جلد السكاري ولا تقتصون من سارقي قوت الشعب .. أقول ليهو شنو؟
• لماذا تقومون بتشييد مسجد داخل مستشفي بألاف ملايين الجنيهات والمرضي بالمستشفي (ذاااتو) يموتون لأنهم لا يجدون ثمن الدواء … أقول ليهو شنو؟
• في كل دول العالم يمكنك أن تحتفل بزواجك حتي صباح اليوم التالي .. لماذا تنتهي حفلات زواجكم عند الحادية عشرة مساء؟ أقول ليهو شنو؟
• بلدكم دي ليها ربع قرن والمسئولين فيها ياهم نفس المسئولين .. إنتو السودان بتاعكم ده ما فيهو غير الناس ديل؟ ؟ … أقول ليهو شنو؟
• وكت أصلو عندكم الوزارات والمؤسسات ممكن تجنب ليها قروش لا تتراجع ولا يتعرف التصرف فيها كيف .. طيب أورنيك 15 بتاعكم ده فايدتو شنو؟ .. أقول ليهو شنو؟
• وكت أصلو (القصة ما دينية) والجنوب وافقتوا على فصلو طيب ليه إنتو قعدتوا تحاربو السنين دي كووولها وصرفتو دم قلبكم على الحرب وألاف من شبابكم مات فيها ؟ .. أقول ليهو شنو؟
• ليه تستغرق صيانة كبري لديكم سنيتن ونص ؟ الكبري ذااات نفسو بيتعمل في مده أقل من كده .. أقول ليهو شنو؟
• المسئول عندكم بيستقيل لمن يجلط ليهو كم جلطة؟ … أقول ليهو شنو؟
• أي فريق كورة عندكم يتغلب يرميها طوااالي في حكم المباراة .. هو أصلو عندكم مافي فريق بيتغلب عدييييل كده؟ … أقول ليهو شنو؟
• في حالات جرئم الإغتصاب المثبته على الأطفال عندكم لاحظت إنو الأحكام متفاوتة مع إنو الجريمة (متماثلة تماماً) … تلاقي قاضي يحكم بالجلد وواحد تاني بالسجن وواحد تالت بالإعدام .. هو شنو كل قاضي عندكم عندو قانون براهو ؟ أقول ليهو شنو؟
• مع إنو قاعدين تسمو شارع (الخرطوم- مدني) شارع الموت وهو شارع غير مطابق لأبسط مواصفات السلامة وقاعد يكتل فيكم بالعشرات ليه الحكومة ما عاوزة تلصلحو ؟
• مع إنو عندكم حرس حدود وجمارك ومكافحة تهريب وهيئة مواصفات ومقاييس لكن كل البضاعة الفي أسواقكم مضروبة وتقليد ! أقول ليهو شنو؟
• الزول العمل ليكم ثورة التعليم العالي وفتح ليهو تلتمية جامعة ده ما كان عارف إنو لازم يوفر فرص عمل للخريجين وللا كان عارف .. أقول ليهو شنو؟
• هل الشريعة مطبقة في بلدكم دى وللا ما مطبقة … ممكن توريني ؟ … أقول ليهو شنو؟
كسرة :
خليكم من الفوق ده كووووولو هسع لو سألني عن الكسرة التحت دي … أقول ليهو شنو؟
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

elfatih.gabra@gmail.com

ودعتكم الله ،،، لمن نتلاقى في موضوع جديد