ودالشلهمة في اللزرق

هذه أبيات من طه ودالشلهمة في
الناظر الشيخ محمد صديق طلحة والملقب بـ (اللزرق)
رحمه الله رحمة واسعة وأسكنه فسيح جناته

التقل المردّف قمت بى ومابهمك
ودربك عقبة فاقر والبرف ما بلمك
عدوك يثبت فضايلك ويشكرك ما بذمك
وراحة العامة باذل ليها مالك ودمّك

*********************

يامولاي تمد فيهو وتباركو عوضنا
ماشمّـت علينا الشامتين فقـّدنا
وكتا ً فيهو سهرانة العيون رقـّدنا
إلا تضرنا نفوسنا ويعيقنا حسدنا

*********************

آنست الحواتم في الكرم والجود
يا مونة الهمد ضوو وعِدِم موجود
زمناً فيهو بنقلب أب فراشة عتود
ليك كل القبائل بي نباك شهود

*********************

في سنين الزمان الحرّة
فيضانك كسر دفر الهشائم برّة
العشرة المبايعين بالسريرة الحُرّة
ليك حماية من عين الصلح والضرّة

*********************

في سنين المجاعات والليالي الكدرة
غيرك مافي دلاعة ً بدت بى هدرة
بحرك هدّم القيفة وكسر لا السِدرة
راجيك بالمواريث الدّلع والقـُدرة

*********************

ضربتك ماها سلاخية داب الصوف
تازي وتشفي وتعل في سمير الجوف
ممنوع من وصول بابو البخل والخوف
يا دُخري القسا القم بالحِمِل مردوف

*********************

قدُرمايضرعو الضارعين بيقصروا دونك
يا دُخري القواسي البنعرف مضمونك
الجود والصبر ما بتنشكر بي شئونك
دوبالاً بِعِل إتبسمنلو سنونك

*********************

في عوج السنين القابلن بالضيق
شال حملا ً مردّف ما اتلقالو رفيق
وارث كافر أب درقة أب رضاعة ريق
مضرّة المهلة بتجيب الجفا وبتعيق

*********************

فارسا ً في الميادين يتحكو بيها ضكرتك
يا الخير النتائج يرجعن لي ذكرتك
الجود ايّاهو ورثك يا العديلة خبرتك
وما قصرت موفرة في المكيلة عبرتك

*********************

الله أداك في باب المغطى كشوف
خلاك غادي تنظر ومن بعيد بتشوف
بترض القصاير وتنفى عامر الدوف
ما دام إنت سالم جبر القلب من خوف

*********************

وداعة المولى يادُخري القسا المعروف
تحسن في البيختو وتصنع المعروف
معاك الليدو طايلة وعينو غادي تشوف
راعي ومرعي مأمون القلب من خوف

*********************

فوقك ما بكابر قلبي بنفى الخوف
وبخرب زينة البنفخ جراب الصوف
تسابك نيلو سادر مو خدار في جروف
اعمى الأذنو سدّا وعينو ما بتشوف

*********************

حويناك عموم أهل الحوا الما بدّو
وين ما تقوم معاك ما بقدموك وبصدّو
الفوت هيلو ثابت ورث أبوهو وجدّو
قلابين سروج اللي عداوتو بشدّو

*********************

رجح وزنو بي الأكبر عليهو وندّو
والفَقْد البحيِّر بالضفر بتسدّو
تقل العامّة ما بقاسيك بتعرف جضّو
نحن فراحة طالت غُدّة البنغدّو

*********************

وين ما يبنو بنيان في دقيقة تهدّو
طو طو منسج الناسجين قدُر ما يسَدّو
خلاهم لهاه الدّايرين يجرِّبو عرضو
دربك عطّش الماسكنّو قِنعو وصدّو

*********************

ضربك ماهو سلاخي القصير بترضّو
خصمك إن سِلِم من السبيب بتكدّو
يا الكبري اللزم تقل العليهو بعدّو
نقزي الفارة في الكرتوبة هيِّن حدّو

*********************

ما حاسبت كشفا ً شفت ربحو وفرقو
نفيت الخوف قلع شتل البخل من عرقو
وجعا ً حرّو سم بتكتمو ما بتمرقو
وفي رايك بحور والجربوهن غرقو

*********************

خيول فزعك سراع والرّاكبن من شرقو
بالجري ناس طرور من دفرتن ما بمرقو
ضربك ليهو راس ما قت حجا وبتعرقو
من مالو المغيبّو وجنا بتفرقو

*********************

ما بتضايقك الكلمة وبتابا عشاك
مالي وشِّي وقفاي وما بقبِّل شاك
ورثاً هول جدودك وسجّلو الربّاك
حوزك للفضائل بتعترفبو أعداك