شيء من دوبيت الفرجوني

يا ودالمبارك ياخي بالحيل عجبني مسدار القمرية
بس وين الباقي ؟ على العموم يا حبيبنا بديك مربوعة واحدة
في القمري والباقي يا جماعة كلام ختري خلاس !!!! أدونا فيهو رايكم
وكان ما أخاف الكضب أنه قاصد عمر ود طه ودالشلهمة بس حمزة دا ما عرفتو .
"ياريت تصححوا لي الكلام دا" .

***************

مالو القمري في فرعو الندي بسجعلي
لايملي الزمان البي الخلا منجعلي
برجع للوطن كان ما الموت يجي ويفجعلي
لكن الشباب واحزني مو راجعلي

***************

عمر الدنيا للبعرف حسابو تلاتي
يوما راح و هسع يوم ويوما آتي
مادام عمري زايل زي زوال الشاتي
خلني ها النواصلو القلبي بيهو بهاتي

***************

يا ود طه لا تقولي ولا تناصحني
متل القمري مالك بغناك جارحني
من الطيفو لا بفارقني لا ببارحني
بسأل ربي كان الموت يجي يريحني

***************

يا لا يمني في طربي وغنايا وشوقي
مهما تلومني ما بتحمي القماري تقوقي
وكت الموت علي مكتوب وقدرا فوقي
خلني ها النغنيلو الظريف الذوقي

***************

تبسيم التبر في خضرة أرض الفودة
في تبسيم شفاه سمحا ضفائرو بقودا
قول للجنوا بيه قلوبكن المفقودة
في ناعساتو حابساهن رموشو السوداء

***************

يا حمزة الزمن لا بد يفتح طاقة
تجيك أيامو بي راحة ومعاها رواقة
الفي الغربة بايتين كلو ليلة شفاقة
يتلاقوا وتموت نار اللظى الحراقة

***************

بحلم والحلم يا صاحبي ما هو ممنّّع
بركب فوق هجينا سرجو زين ومصنع
قاصد السمحة مستولة الترى التترنع
كاملة الحيا الليها الطفيق ما اتدنع

***************

جفيل البل علي المطر الوقع في رشاشو
وحن القمري لفريخاتو في عشاشو
حنين الغربوهن وفي المنافي بشاشو
عندي وشاهدي ها الدمع النزل بشاشو

وحرم ما بقيف تب !!!

وأبقو طيبين ...

ودحيدوب