وقفة مع شباب اليوم

اليوم كنت راكباً احد المركبات العامة وصاحبها كان مشغلاً شريط كاست شبابي علي حد تعبيرهم وهو من اشرطة الاغاني الهائفة جداً في رائي الشخصي والله لم اعرف الفنان الذي كان يغني ولكن ما لفت انتباهي احد اغانيه يقول في احد مقاطعها انشاء الله اجن ..... وبكل وقاحة ومياعة تستكثرها علي النساء يقول بعده (ابرأ) وهي كلمة كما تعلمون متداولة بكثره عند النساء.
حينها جالت بخاطري مقاطع دوبيت للشاعر صديق محمد العوض التي ينتقد فيها الجيل الحالي ويقول انهم تخلو عن بعض العادات السودانية السمحة كالعرضة وتقدير الكبير والنساء واصبحوا يتشبوا بالنساء ويهتمو بانفسهم ويرقصون .
****************************************
يقول:ـ
جيلاً تب عاد خليهو
لابيفهم برا ولابيتبعك توريهو
تلقاهو منتبه في خنفسو وشارليهو
والكجن الشديد لي البنصحو ويهديهو
****************************
سمحين كلهم زي الوحوش والصيد
لاكن برضو غايتو عندهم ترديد
في ساعة الرقيص ساعة يتوهو شديد
افكر لي عفاف عضلية من لا وليد
*****************************
الجيل نظرة عامة تشوفو جيل ود ناس
تمش الحفلة تلقي القصة بايظة خلاص
العجب العجيب ان قام نقر ترباس
ينبزو في البصوقر ويشكرو الرقاص
***************************
قت لي مها تكلم سمية تقيف
نشوف العرجن الليوني برقص كيف
مرة يتقلو ومرات يسيهو خفيف
سجم امك عقب ما اظن تهز بالسيف
*****************************
مرة حكولي واحداً يحيرك بي فنونو
بنات الحفلة ايها بنت تقصر دونو
يخت ايديهو في وشو ويجيب في قونو
تاجوج زاتا تحتار في رقيصو ولونو
*****************************
يوم لاقاني واحد الا ماتأكدتا
قُتلي عشة ماناقمني تاني سكتا
يشبة ليلي بس تحلف تقول تومتا
حتي السلسل الدارعاهو في رقبتا
*****************************
عقال البلد ادوني منكم ايد
نعالج القصة قبال الحكاية تزيد
ديل سالف الاجانب قلدو تقليد
وقانون الشريعة انزحو منو بعيد
*****************************
عقال البلد وروني اعمل كيف
ديل اتخلو من لعب الدرق والسيف
ودرسهو الرقيص كلو التقيل وخفيف
بتساعدوني فيهم والله احسن اقيف
*********************************
ياخ مايغشك الجيل بي نظافتو وظرفو
انا سايستو والله التراب مابعرفو
في الوالدين يحمر ديمة مابرد طرفو
والفاهم بقولك ابويا الله يقرفو
***************************
ما يغشوك بالتفه وخلال عيدان
يخسي واخ وتف وسلامة الصبيان
في حالة السفر مابقدرو النسوان
ولي القدر امو قال يا حاجة قرصة كمان
*********************************
مالك ياجيل بترقص تقول جنيت
وسط الاحتفالات محت واتنيت
ما أظن شلتلك سيفاً سنين هزيت
هجم امك عقب غسل كبابي البيت
******************************
ياجيل الرقيص سووهو للبنوت
بدوركم تبقو زي فارس العدو المختوت
وكت الحارَة تحصل والحكاية تجوط
تجوها متلبين صارفين جميع للموت
**********************************
ياجيل الرقيص ماسوهو للاولاد
بدوركم تبقو زي الفارس العراض
حقنا كان كِتل وغلبنا لي مشهاد
تجيبو الضغط من الاجانب صاد
*********************************

وله وقفة مع البنات سنتطرق لها لاحقاً
ودمتم

بتمناك تكون في الاسرة جمل الشيل
بتمناك تزيل الــــــــــغم تعدل الميل
بدورك في الهموم تقسم معاي وتشيل
لكن الميوع فوق الرجال مابخيل

بدورك في البنات تعزل تشير وتعين
بدروك لي الضعاف تغرف تشيل وتهين
انا داخلت الرجال العاصي والمٌدين
ماشكرولي زول قالولي رقاص لين


وياطحله حالة الشباب محزنة للغاية والله ونسال الله ان يصلحهم ان شاء الله ..
لك الشكر والتقدير