الفيس بوك في الدوبيت

قال ود ابنعوف :
يا الفيسبوك تراك كل يوم تجيبلنا محنا...
لميت الخلوق من كل جنس وسحنه...
من تعب المساسقه بالدروب أرتحنا...
الدكتوره فيك أم الجنا وناس نحنا...

... الجراقه فيك أهل القنص والتار...
الغنايه والشاشايا والدلاكه والشكار...
اهل التقوى سنه وشيعه ناس النوبه والكفار...
عسكر وكاكى فيك العلم والاشعار...

ياكين ياخساره فيك فعايلن نيه...
فيك البنهشو الاعراض وإقجو الخيه...
فيك وشوش ملايكه وزمه شيطانيه...
فيك نلقى الولد مسمى روحو بنيه

مزرعة أم مسورن لا كديب لا حشه...
سعادتك كضبة ساك وانا فيكى ما بنغشه...
الزول البرسلا لى تجيهو الكشه...
بطنو تجهجهو من مويه ساك إتدشا...

حواشة الكضب لا نقحه لا تربالى...
شن باريت زراعتك دوب دفقته أمالى...
يا العدة زراعتك فيس ولابتوب عالى ...
وأنا موبايلى كان خشاك بجيهو زلالى...

وأنا دوب زراعة الحشه والسلوكه...
بلادى مدنقده لى كم نفر ملوكه...
من دغش الله أمدغ فى وجيعتى وألوكا...
شلنا نصيبنا فى الزايله أم قدود دلوكه..

الشفيع :
الفيس فيه من صافي الرجاله معارف
فيه التبه من بحر المكارم غارف
فيه الشيكو رابح وقتي بمرق صارف
لكين فيه الأختو بتغازلو وبكون مو عارف


ود المبارك :

يا جيلي اصبح همك تدردش او نتيجة الكورة
في النيمبوز معلق والفيسبوك كذا صورة
انعقّ الابو ضاعت صلاتك والعلوم مدحورة
مسخ الكلام فيك وجزا البنصحك ماسورة