مسرحية المك نمر

أخوك يا ريّة أخوك وقت الخيول يدبكن
اخوك يا ريّة أخوك وقت الرماح يشبكن
أخوك جبل الثبات وقت القواسى يتحبكن
كم بكيت وكــم قشيت دمـوع الببكن

* كان خير و لو شر برجاه ما بهـم بـالى
وحارثنى الثبات من الكبـار قُبّـــالى
وقت حســع حسيت وشفتك قاعدة قِبَالى
إن إتلخبط الكـون تـانى مـانى مبـالى .

* سلّ سيف لاقاهم اخوك يالضامرة
تور غنز ام هشيم الفى المجامع دامرة
سيل تلا واندفق فوق السحابه الهامره
حجر الصاقعه فرتاق الصفوف العامره .

* بطال البعيش فى الدنيا اصلو مناهو
إن كان مالو راح غير اهلو مو مدناهو
سمح الفوق اساس ابواتو تّم بناهو
والزول دون قبيلةُ مناهو شن معناهو.

* ما بنفرح بمال ونقول كفانا ورثنا
نفخر بالرجال فى الحارة يبقوا ترسنا
نجمع ناس هيلنا من الكبار حارسنا
يحضروا اهلنا فرحانين يباهوا عرسنا.

* هأ الموت موشمت غاية البفوت والببرو
والجد والحزن ما جابو زول من قبلو
الزول فى الشدايد اول يلزم صبرو
بترجي الكريم مولاه كسرو يجبرو

* بنخاطر من الوجعه هيلنا برانا
نحن اهل المصاب الناس لُزم جابرانا
فى آخر المراح دايما تجى الفترانا
عات الحد ندوسه الناس عقب تبرانا .

* الناس بالمكارم والفعال تتباها
وينشأ الزول فطرة حسب مرباهو
عادت جِدُ عادتو ومثل أباه نباهو
يلبس توب قبيلتو ان دار والله اباهو .

* آه يا ريت السعادة ان كان بقت بديه
كنت اعيش هنى فى الدنيا بالزنديه
علىّ حكمُ ناس الفيّ طلبوا الدِيه
الموت بالعطش والمويه بين إيدِيّه.

* أنا بت الرجال اهل الحدق والسيف
بت الما بهم بحساب الخريف والصيف
بت البيحجزوا المرقوب البكرموا الضيف
انا ريّه ان كان شفتكم افوتكم كيف .

* توقد نارو ديما الما بكوس الجمره
وفى ضيفان يمين وسكين دايما حمره
بكاس ما عبر لبن يجيك بالعمره
هيل الشكر..هيل الرّآس..هيلُ الأمره.

* الزول إن وعد شين كان ميعادو يخلفو
وفى ربط اللسان يسخابو دمو يتلفو.

* الولد البخاف من القبيلة تلومو
بخلف ساقو فوق تيساً رقيق قدومو
اما يجيب رضوه البهم البينقر فومو
وإما تخامشن قدح الرماد حرومو .

* إن مال الشجر ما بكسرن فراعو
وقمحان الطلب لي الما بجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو.

* انا المالح الكارب خريفي وصيفي
المثلك تبيع ما بطول فوق قيفي
كان الليله في بيتي وبعدك ضيفي
في الشي السمعتو برد عليك بي سيفي.

* الزول في الرقاد شقو البريحو بخبرو
والزول البليد بي ايدو يحفر قبرو
عاد بنسوي عوسنا وطه يلزم صبرو.

* سوي الدايره وكتر الكلام خليهو
والشر القصدتو معاي ابقي عليهو
طير اصل السما حتي القمر دليهو
يوم نتلاقه كل واحد بعرف الليهو.

* صدق القالوا خربانا البلد بكبارا
ديك ريا أسألوها واعرفوا خباره
من غير السفر ما عندي تاني دباره
نحنا وانتو بي دي الحاله ما بنتباره

* من الفيها ما بزح ان تزحزح مره
وان حين نعود ان طال زمنا ومره
عيش الدنيا ان كان يحلى وان كان مرة
الزين ما بدوم والزول بموت فت مره.

* ليه خايفين علي؟؟ الدنيا عيشا مخاطر
الواجب نسوي ونرجي ستر الساتر
في وداعه الكريم الليله نيتي انا خاتر
يا دار ريا ما كان الفراق بالخاتر

* كفايه مع السلامه انتهينا خلاص
غير الشوره دي ما لينا تاني خلاص
في يميني ابحريره الدكري القصاص
ما بخاف ود دكين ان جاني بي رصاص

* هسع تشوفو ان كان صح وكان تهديد
وصلتو الميس ده حين .. وحديد يلاقي حديد
بنبرش الطروره ويثبت الصنديد
خليهو المضي لاقي البجيك جديد .

* الداير الغني يعمل حساب لي فقرو
كعب الضله كيف المتلي انته تحقرو ؟؟؟
ابسوميته خلي الليله سيدكم اعقرو
وين تاني الملاج وكتين يتلب صقرو.

* اياك عز القبايل و الكرم فيك طبعه
و جارك ما بهم ان كان مسوي السبعة
ان كان اجلى تم اخد قصاصى التبعه
و الياكلو الاسد اخيرلو من الضبعة

*كان ضيفنا ما نحجاه و ندافع عنو
نرمى سيوفنا ليه تانى الحصان ساعينو
قديم يا مك ديارنا مرتع الامال
و شعبة الكون وركازة الزمان ان مال
صغيرنا ان جال يضاير العوق يمين وشمال
بدمانا النزيل نحجاه قبل المال .

*انتو كبارنا شورتكم جمعنا بتعمرو
مارستو الدهر ضايقين حناضلو و تمرو
غاية الحى فناه الموت نهاية امرو
لكن بى وراه ذكرو بصبح عمرو

* نمرا يركب الكيك البطل يتحرن
نمرا يقلب العوق ام صفوفا جرن
خلوات صدرو فى علوم الحروب كم قرن
سيفو بينسف الدرع الحديدو مقرن

ما نمر الشدر حاضن فروعو مقيل
ده النمر البضاير الصف محل ما يميل
كل ما اقول شكر القاهو فيهو قليل
كفو بيخجل العين السحابها منيل.