مجموعة جديدة 11

عنوان المقال : ( صابر و العيد )
لم يعرف النوم إلى عيني (صابر) سبيلاً حيث قضي ليلته يفكر في ما عساه ان يفعل حين يطل فجر الغد .. فجر العيد الذي من المفترض أن يكون سعيداً لولا أنه لم يستطع الإستعداد لقدومه إذ لم تسمح جيوبه الخاوية من شراء ملابس العيد لاطفاله الصغار ولا حتي (الخروف) الذي دأب على شرائه منذ أن تزوج قبل أعوام طويلة .. ومع إنبثاق الفجر وهو على هذى الحال أتاه صوت من بعيد
- أنا العيد !
- إتشرفنا وأنا (صابر)
- لا ما أقصد .. أنا العيد الوااحد ده البيفرحو فيهو الناس ويضبحو فيهو الخروف ويلبسو فيهو جديد
- ياخي بالله الواطه صباح أدينا عرض أكتافك من غير مطرود .. اصلو راسنا مسخن من الفلس
- ياخي معقولة ؟ تطردني؟ في زول بيطرد العيد !
- والله أطرد ليك الوقفة ذاااتا
- مالك إنتا زعلان ياخ هون عليك
- أها شفتا أنا جني وجن ناس (هون عليك) و(أحسب أن) دي
- ودي دخلها بالعيد شنو؟
- عندها دخل ما عندها دخل أنا مما أسمعا بتعمل ليا عصبي ! أنتا عاوز تصاحبني شكلك كده ؟
- لا والله الحكاية بسيطة أنا قلتا بس أجيك عشان تفرح بيا وكده
- أفرح بيك؟ إنتا من زمن المواطن بيفرح بيك؟
- كيف؟
- ده كان زمان يا عيد .. أيام الخروف كان (عشر) المرتب .. هسه المرتب (عشر) الخروف
- يعني هسه إنتا ما فرحان بيا ؟
- عاوز النصيحة وللا حاجه تانية ؟ هسه والله مما تقرب (تجهجه باكاتنا) ذااتا وتخلينا في حالة (شرود ذهني) وسيحان في المفاصل !
- بالله أنا كعب كده؟
- ياخي ما تفهمني غلط أنا ما قلتا إنتا كعب .. نحنا الكعبين !
- ما فهمتا
- ما فهمتا كيف؟ إنتا العيد بتاع (كوريا) وللا اليابان ؟ مش عيدنا القاعد معانا هنا ده !
- لا ما قاعد … بغيب عنكم سنة كاملة وبعدين بجيكم !
- أها شفتا السنة الإنتا بتغيبا دي هي المشكلة
- كيف؟ لو عاوزنني أجيكم كل أسبوع ما مشكلة !
- ياخي عليك الله ما تهظر هو أنحنا كل سنة قادرين عليك .. إنتا قايل نفسك براك ؟
- أنا عارف نفسي ما براي معاي أخوي (عيد الفطر) !
- عيد الفطر بس؟ وعيد المدارس وعيد الجامعات وعيد العلاج وعيد المواصلات وعيد الدواء وعيد الكهرباء وعيد الموية وعيد (القفة) !
- (مقاطعاً) : بالله دي كووولها اعياد عندكم (ثم) وبرضو بتضبحو فيها؟
- لا بننضبح !
- بي مناسبة ننضبح دي .. ما سامع ليا صوت خروف عندك !
- يجيبوهو بي شنو؟ أجيب ليا ملايين من وين؟
- كيفن يا صابر ما تشوف ليك يسلفك ؟ أو يديك ليهو بالأقساط؟
- إنتا عاوز تبقى ليا زى (الجماعة) وللا شنو؟ قول إستلفتا وللا أشتريتو بالأقساط أسدد قروشو دي من وين؟ الناس دي يا (عيد) بتتكلم سااااكت
- كيف؟ ما قالو ليك المسألة دي جايزه
- القضية ما جايزة وللا مكروها .. القضية هي إنو ظروفي ما بتسمح ليا أدفع أي اقساط !
- طيب إن شاء الله تكون فرحتا الأطفال وإشتريت ليهم ملابس عشان يقابلوني بيها !
- والله إنتا ما عارف حاجه ساكت .. تغيب ليكا سنة وتجي وما عارف ملابس الأطفال أخير منها الخرفان !
- يعني شنو؟ إنتا السنة دي ما معيد بيا ؟
- بلاش إستفزاز معاك .. أمشي شوف ناس (أحسب أن) المعيدين .. الساعة بقت تسعة .. خلينى أمشي أجازف ليا (فول ورغيف) أفطر بيهم الأولاد ديل !!
كسرة :
(خروف) مافي .. . (رادار) مافي … الله في !!
كسرة ثلبتة :
أخبار ملغ هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( مقالات المناسبات )
عندما يهل شهر رمضان الكريم تقوم الإذاعة بنفض الغبار عن شريط أغنية (هلا هلالك يا رمضان شهر التوبة والغفران) ثم ما أن يشارف الشهر الكريم على الإنتهاء حتي ياتيك صوت (ميرغني المأمون وأحمد حسن جمعة) وهما يصدحان (أوحشتنا شهر الصيام من بعد ما شرفتنا شهر الصيام) ثم يأتي العيد فتقوم بفتح المذياع صباحاً لتشنف اذنيك ذات الأغنية التي تسمعها صباح كل عيد والتي يتغني بها الفنان الذري ابراهيم عوض برائعة الشاعر عبدالرحمن الريح (يا عيد تعود يا عيد بالخير علينا سعيد) !
العبد لله يعتقد بأنه كما أن هنالك أغنيات تذاع سنوياً عند المناسبات والأعياد فإن لديه عدد من (مقالات المناسبات) التي تصلح للنشر عند كل مناسبة كما هي دون إضافة أو تجديد .
فعندما يأتي الخريف (كل عام) ما على العبد لله إلا أن يخرج من أرشيف مقالاته ذلك المقال الذي بعنوان (وجاء الخريف فجأتن) .. والذي يوضح فيه الكاتب كيف أن تصريحات المسئولين عن جاهزيتهم لإستقبال الأمطار لا تقل عن جاهزية فريقنا القومي لدخول تصفيات كاس العالم !
وعندما تسقط إحدى طائرات (الأنتينوف) ما على العبد لله إلا أن يقوم بنفض الغبار عن مقاله الذي درج على نشره كلما مرت هذه المناسبة (غير السعيدة) والذي يوجد به هذا (الفورم – البيان) المعد ليقوم المسئولون بملئه :
• تحطمت (صباح/مساء) اليوم …….. الموافق ……………….طائرة نقل أنتنوف 12 بعد (إقلاعها/هبوطها) بقليل (من/على) مطار ……………… (متوجهة/قادمة) (إلى/من) مدينة ……………… كان على متنها ………………… شخصاً إضافة إلى طاقمها المكون من ………… أشخاص توفي في الحال منهم …………… شخصاً ونقل …………. إلى المستشفي وقد كان سقوط الطائرة نتيجة لعطل فني في محركاتها .
أما عندما تخترق الطائرات الحربية الإسرائلية أجواء بلادنا وتصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) فما على العبدلله إلا أن يقوم بفتح درج مكتبه وإخراج مقاله الذي بعنوان (صندوق دعم الرادار) والذي يتحدث فيه الكاتب عن الغبن والأسى والمهانة التي يحس بها كمواطن وهو يري أجواء بلاده تستباح والذي يخاطب فيه المسئولين (كلما جاتنا ضربة) قائلاً :
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار)
نعم .. بصراحة، لم نعد بحاجة إلى الكتابة وتنوير المسئولين عن مكامن السلبيات املا فى إصلاح الحال وإيقاف هذا السيل من البلايا والرزايا والكوارث والمحن التي نعيشها.. ما أهو قاعدين كل خريف بنكتب مقال (جاء الخريف فجأتن) والحال ياهو نفس الحال وكل سقوط طائرة قاعدين نكتب (أنتوفيات) والحال ياهو نفس الحال وكل ضربة (إسرائلية) قاعدين نكتب (صندوق دعم الرادار) والحكاية بتتكرر والمسئولين سادين دي بي (طينة) ودي بي (عجينة) !
نعم للأسف الاسيف انه لا حياة لمن تنادى وأن القافلة تسير دون أن تلتفت إلى (نباحنا) المتكرر لتلافى أوجه النقص والقصور عشان كده أالعبدلله ببفتكر إنو ما على هذا الشعب المؤمن الصابر (المحتار) إلا الدعاء نعم (فقط الدعاء) بأن يقي الله هذه البلاد شر الفتن والكوارث وأن يقينا تصريحات المسؤولين التى أصبحت (تحرق الدم) وتصيب المواطن (بالغبينة) بعد أن إنفقعت (مرارتنا) من زماااااان !
كسرة :
مجرد رجاء أن يقوم المسئولون عن أمن (البلاد والعباد) بإزالة مجسم تلك (الطائرة) من أعلى مبني براج (القوات الجوية) بوزارة الدفاع وكذلك مجسم (السفينة) من أعلى برج (القوات البحرية) عشان (الصهاينة ) ديل بدون (مجسمات) مطلعين عين أبو أهلنا وما ناقصين اليوريهم وكده !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( ده يكون من شنو؟ )
تقول القصة أن سيدة كانت تنتظر طائرتها في مطار دولي، اشترت كتابا من مكتبة المطار لتقرأه (كعادة الخواجات) كما قامت بشراء علبة بسكويت معه ، جلست وبدأت تقرأ كتابها ، وكان يجلس بجانبها رجل يمسك بصحيفة يقرأ فيها ، عندما بدأت السيدة فى أكل أول قطعة بسكويت من العلبة التي كانت موضوعة على الكرسي الذي بينها وبين الرجل فوجئت بأن الرجل بدأ في أكل قطعة بسكويت من نفس العلبة التي كانت هي تأكل منها ، بدأت السيدة تفكر بعصبية لدرجة أنها فكرت أن توجه له صفعة قوية على وجهه لرزالته وقلة ذوقه … عندما تبقت علبة البسكويت قطعة واحدة فقط نظرت إليها وقالت في نفسها “ماذا سيفعل هذا الرجل قليل الذوق الآن”؟ لدهشتها قام الرجل بقسمة قطعة البسكويت إلى نصفين ثم أكل النصف وترك لها النصف .. كظمت السيدة غيظها وأخذت كتابها وبدأت بالصعود إلى الطائرة وعندما جلست في مقعدها بالطائرة فتحت حقيبتها ،وفوجئت بوجود علبة البسكويت الخاصة بها كما هي مغلفة بالحقيبة ، وحينها أدركت أنها كانت تأكل مع الرجل من علبته، وقاسمها فى علبة البسكويت الخاصة به بدون أن يتذمر أو يشتكى !!!
من القصة (الفوق دي) يتضح أن التريث نعمة .. جاء في كتاب لسان العرب لإبن منظور .. الرَّيْثُ: الإِبْطاءُ؛ راثَ يَرِيثُ رَيْثاً: أَبْطَأَ ورَاثَ علينا خَبَرُهُ يَريثُ رَيْثاً: أَبْطأَ. وما أَراثكَ علينا؟ أَي ما أَبْطَأَ بك عنا ، ورجل رَيِّثٌ، بالتشديد، أَي بَطِيءٌ؛ وتَرَيَّثَ فلانٌ علينا أَي أَبطأَ؛ وقيل: كلُّ بَطيء رَيِّثٌ؛ والاسْتِرَاثةُ: الاسْتِبْطاء. واسْتَراثه: استبطَأَه. واسْتَرْيَثْتُه اسْتَبْطأْتُه.
المسئولون لدينا (التريث ده ما بعرفوهو) فما أن تنزل علينا نازلة أو يقع علينا خطب من الخطوب (وما أكثرها) إلا ويبادر أحدهم (والموضوع حار من نارو) ويلقي بالتصريحات هنا وهنالك وما أن تمضي ساعة واحدة إلا وتكون تلك التصريحات التي ألقى بها ذلك المسئول مغايرة تماماً للواقع ، والسؤال الذي يفرض نفسه هنا هو : ما هو السبب الذي يجعل أمثال هؤلاء المسئولين يسارعون بالتصريح والحديث وبهذه السرعة؟ هل يغتقدون بان ذلك السلوك سوف يكتب لهم في ميزان حسناتهم (الوظيفية) ؟ أم يعتقدون بأنهم بتصريحاتهم تلك يبعثون الإطمئنان في قلوب المواطنين على أساس أن (الحكومة متابعة وعارفة أى حاجة) ؟
بالطبع عزيزي القارئ أنت لا تحتاج إلى أي أمثلة فكل الأحداث والكوارث والنوازل التي مرت على هذا البلد كانت التصريحات التي أدلي بها المسئولين بعد حدوثها مباشرة لا تمت للحقيقة بصلة .. (وهي في واد والحاصل في وادي تاني)
وآخر هذه التصريحات المتعجلة تصريح السيد والي الخرطوم الذي أدلى به عقب (تفجير مصنع اليرموك) والذي أكد فيه نافياً وجود ضحايا في الوقت الذي فاضت فيها أرواح بعض المواطنين إلى بارئها وإحتشدت المشافي بالجرحي !
وحيث أن إنفجاراً هائلاً مثل هذا الإنفجار الذي وصل لهيبه إلى عنان السماء وإقتلع دويه الأبواب والنوافذ وطارت على إثره السقوف وأهتزت من فرط قوته المباني ليس بالشئ السهل التوصل إلى مسبباته في غضون سويعات ولا حتى الـ FBI إلا أن السيد الوالي أفاد وصرح (على طول) وفي عجالة يحسد عليها بما معناه أنه (لا يوجد مؤثر خارجي) معطياً الجهة المعتدية شهادة خلو طرف رسمية وكمان (مختومة) !
كسرة:
ده كلو كوم والإفتاء بغير علم كوم تاااني .. كذلك المستشار الذي صلته باالطيران والطائرات كصلة العبدلله باللغة (الأوزبكستانية) والذي صرح في عدد من الصحف اليومية عند سقوط طائرة (تلودي) بان أسباب السقوط تعود إلى (الطيار الروسي) ! … ده يكون من شنو؟
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عنوان المقال : ( إذا سرق فيه (الشريف)!!! )
أيها الإخوة والاخوات والأبناء والبنات السودانيين والسودانيات داخل وخارج الوطن اليوم تبلغ (واوات كسرتكم الثابتة) حداشر (واو) .. نعم حداشر شهر (وكم يوم كده) منذ أن إعترفت الدولة رسمياً بأن هنالك من قام ببيع خط لندن أو الخط المعروف بخط هيثرو؟ وبعد أن استقصت اللجنة البرلمانية التي تم تشكيلها في الوصول إلى الحقيقة الأمر ومن ثم دفعت بملف (القضية) إلى النائب العام أو هكذا يعتقد!!
ولأننا دولة إسلامية رسالية ذات مشروع حضاري لا ياتيها الفساد من أمامها ولا من خلفها مسئوليها غر الجباة بيض الايادي من كثرة الوضوء وكل دقيقة والتانية يقولو ليك (العندو ادلة على الفساد اليجيبا) فقد ظننا وليس كل الظن إثم إن (قصة الخط دي) ح تعامل بالشدة المعروفة في شرعنا الحنيف تجاة تنفيذ العقوبة على السارق والذي لن يكون باي حال أفضل من (فاطمة بنت محمد) التي لو سرقت لقطع (صلي الله عليه وسلم) يدها ، كما أننا كنا نعتقد بأن (شركاء الجريمة) لن يفلتوا من العقاب عملاً بقول نبينا الكريم صلى الله عليه وسلم في الحديث الذي رواه البخاري والذي جاء فيه : «إنما أهلك الذين قبلكم، أنهم كانوا إذا سرق فيهم (الشريف) تركوه، وإذا سرق فيهم الضعيف أقاموا عليه الحد» !….
ولكن للاسف الاسيف يبدو انو (الإسلام) وتعاليمه (حاجة) وما يحدث على (الأرض) عندنا حاجة تانية خالص رغم الشعارات المرفوعة و(ما لدنيا قد عملنا) وبقية الهتافات التي ما أن تسمعها حتي تعتقد أنك جالس في احدي سوح (قريش) .
عموماً لن نكل ولن نمل من السؤال ونحن على أعتاب الإحتفال قريباً بالذكري السنوية للكسرة الثابتة عند بلوغ (واواتها) 12 لن نكل ولن نمل من السؤال حول الكيفية التي تم بها بيع (الخط) وكم قبض (شركاء الجريمة) من ثمن؟ وفي حساب من وضعت (الفلوس) ومن الذي إستلم (الكومشن) وكيف تم التخطيط لهذه (السرقة العبقرية) ! هذه التساؤلات المشروعة الحائرة التي نحتاج إلى سماعها من أجهزتنا العدلية التي قالت بأنها قد تمكنت من فك شفرتها وكشف خفاياها .
وختاماً إن كان لابد من نصح فهو إن الصمت و(الطناش) والإعتماد على نعمة (النسيان) حيال هذه القضية (وأي قضايا فساد مجمدة أخرى) لن يجدي بل يهز مصداقية المواطن في أجهزته العدلية وفي قادته الذين ما فتئوا يرددوا بان (تمسكهم بالإسلام) هو (الجاب ليهم الكلام) !
كسرة :
أها المرة دي الكسرة الثابتة عاوزنها كيف .. كده (ووووو و ووووو) وللا كده (وووو ووو وووو) ولا أحسن كده (ووو ووووو ووو) وللا كده (وو ووووووو وو) وللا أقول ليكم كده أحسن (و ووووووووو و) ؟؟
كسرة ثابتة :
أخبار ملف خط هيثرو العند النائب العام شنو؟ (إختار واحدة من الفوق ديل) !!

elfatih.gabra@gmail.com

ودعتكم الله ،،، لمن نتلاقى في موضوع جديد