أكيد إنتَ في السودان
4 مشترك
صفحة 1 من اصل 1
أكيد إنتَ في السودان
لو إنت في بلد فيهو سنه سابعة
وسنة تامنة ابتدائي…
تبقى أنت أكيد في السودان
*****
لو طالعت إعلانات لشركات (مسئول) كبير
وهو لا زال (في الخدمة) …
تبقى أنت أكيد في السودان
*****
لو (لبد) ليك شرطي (مرور) في نهاية شارع (اتجاه واحد) ..
وخلاك لمن دخلت وجاك بي (دفتر إيصالاتو) ..
تبقى أنت أكيد في السودان
*****
لو لقيت في بلد ما فيهو (معينات البحث العلمي) ..
وكل يوم الجامعات تناقش (خمسين) رسالة دكتوراة
و(ميتين) رسالة (ماجستير) ..
تبقى أنت أكيد في السودان
*****
لو أنت في بلد
وزارة الصحة فيهو قالت
(الدواء) ده (فاسد) أحظروهو ..
وبعد شوية قالت (ما فاسد) خلوهو ..
وبعد شويتين قالت (فاسد) أمنعوهو ….
تبقى أنت أكيد في السودان
*****
لو لقيت في بلد
(الصحف) بتتقفل بي (مادة) في القانون
(معمولة للمطاعم) ..
تبقى أنت أكيد في السودان
*****
لما تلاقى الترزي كاتب على باب المحل بتاعو
آية بتقول
(وفصلنا كل شيء تفصيلا) صدق الله العظيم …
تبقى أنت أكيد في السودان
*****
لما تخلص موضوع في مكان ما،
وتجي تركب عربيتك
وتلاقى (المساحات) مرفوعة
عشان تعرف على طول انو في واحد مسحها ليك
وح ياخد منك واحد جنيه …
تبقى أنت أكيد في السودان
*****
لو قرأت الصحف في 1987 أو في 2016
عن (إنتهاء قطوعات) الكهرباء
ولقيت نفس الكلام في صيف 2030 …
تبقى أنت أكيد في السودان
*****
لو زوجة الوزير مليانة دهب
بتتجدع بيه بالعلن في الشارع من غير حساب
وأطفالها بيملطشوا أولاد الجيران...
تبقى أكيد إنت في السودان
*****
لو أهم (كبرى) في عاصمة البلد
صيانتو عاوزة ليها (سنتين)…
تبقى أنت أكيد في السودان
*****
لو بهدلوك في أي مكان
واشتكيت للشرطة
وقالوا دا مش اختصاصنا
امشي اشتكي في الثروة الحيوانية ...
تبقى أكيد أنت في السودان
*****
لو لقيت أنو وزارة الداخلية عندها مؤسسات (تعليمية)...
ووزارة التعليم عندها مؤسسات (صحية)...
ووزارة الصحة عندها (شركات إنشائية)…
تبقى أنت أكيد في السودان
*****
لو دخلت (الوزارة) وأنت مؤجر في (زقلونا)....
وطلعت وعندك عمارتين في (قاردن سيتى)...
تبقى أنت أكيد في السودان
*****
لو اشتغلت في الخدمة المدنية 30 سنه
وأدوك معاش شهرى
يساوى 6 كيلو لحمة ...
تبقى أنت أكيد في السودان
*****
لو توقفت (الحركة) إثناء ساعات (الذروة)...
وإكتشفت أن السبب (كشه)...
تبقى أنت أكيد في السودان
*****
لو عدمت (التعريفة)...
وكمان دخلت في (ديون)...
للإيفاء بنفقات (فراش) قريبك
الذي توفى إلى رحمة الله...
تبقى أنت أكيد في السودان
*****
لو وجدت أن (ترخيص عربتك)...
يساوى (ربع) قيمتها ….
تبقى أنت أكيد في السودان
*****
لو تقدم إبنك (المهندس) لشغل وظيفة
وكان (الإنترفيو) عن (صلاة الجنازة)...
تبقى أنت أكيد في السودان
*****
لو (فجأة) إكتشف (المسئولون)...
أن (الخريف) على الأبواب...
تبقى أنت أكيد في السودان
*****
لو عندك (الكلية) اليمين متعطلة
وعاوزين يشيلوها ليك
قاموا (إستأصوا) الشمال السليمة
لأنو الدكتور كان ماسك الأشعة (بالمقلوب)...
تبقى أنت أكيد في السودان
*****
لو مكث (مرتبك) معك
(تلاتة ساعات وإطناشر دقيقة)
هى الفترة من لحظة استلامه من الصراف
إلى حين عودتك للمنزل...
تبقى أنت أكيد في السودان
*****
لو فاز فريقك الذي تشجعه على الفريق الخصم
في مباراة الذهاب 8/صفر
وخسر في مباراة الإياب 12/صفر….
تبقى أنت أكيد في السودان
*****
لو لقيت لوري التراب
وكومر البلدية من سنة 50
شغال بالإضافة للركشة في نفس الشارع...
تبقى أكيد انت في السودان
*****
لو وجدت أن رؤساء (الأحزاب)..
هم (رؤساء) مدى الحياة...
تبقى أنت أكيد في السودان
*****
لو وجدت أن نسبة الفقر
تزداد بإزدياد (معدل النمو تبع الحكومة)...
تبقى أنت أكيد في السودان
*****
لو ضربتك عربية حكومة
ومشيت القسم و طلعتا انت الغلطان...
تبقى أكيد انت في السودان
*****
لو خشيت مؤسسة حكومية
ولقيت الموظفين مافي أثناء الدوام..
تبقى أكيد انت في السودان
*****
لو طلعت مستحمي و متريح
وماشي عرس
ودخلت العرس زي الكأنك كنت بتلعب كورة...
تبقى انت أكيد وأكيد في السودان
*****
لو لقيت مطعم وقدامو دورات مياه...
تبقى أكيد انت في السودان
*****
لو مشيت الحوادث
وقالوا ليك
(لوعندك رصيد اضرب للدكتور لانو نايم)..
تبقى انت أكيد في السودان
*****
لو شغال في السوق
وقالوا ليك ادفع ضريبة ميزان ...
تبقى أكيد انت في السودان
*****
لو لقيت أجنبي وعواطلي
وعندو صلاحية اكتر منك
والناس كلها تحترمو...
تبقى انت أكيد في السودان
*****
لو اعلنو عن 3000 وظيفة
ومشيت تقدم في اليوم الاول
وقالو ليك
(تعال بكرة لانو لجنة المعاينة ما اكتملت)
وجيت تاني يوم و لقيت التقديم قفل...
تبقى انت أكيد في السودان
*****
لو لقيت حي ساكن فيهو مسئول كبير
والكهرباء فيهو ما بتقطع نهائي...
تبقى أكيد انت في السودان
*****
لو محتاج حاجة
ولقيت اقرب حتة تجيبا منها
على بعد 3 كيلو متر...
تبقى أكيد انت في السودان
ودعتكم الله ،،، لمن نتلاقى في موضوع جديد
رد: أكيد إنتَ في السودان
والله من غير ده كله نحن في السودان
الصديق ودعبدالباقي- عضو
- عدد المساهمات : 2
تاريخ التسجيل : 06/06/2011
العمر : 32
رد: أكيد إنتَ في السودان
لو أنت مقاطع اللحمة في بلد بتصدر اللحوم فأنت في السودان
سليمان أبوكنة- عضوية ماسية
- عدد المساهمات : 45
تاريخ التسجيل : 27/12/2010
رد: أكيد إنتَ في السودان
لو شارع الزلط بكسروهو كل سنة يبقى اكيد فى السودان
لو شفت رئيس بلدك بيرقص تبقى انت اكيد فى السودان
لو شفت رئيس بلدك بيرقص تبقى انت اكيد فى السودان
siddig eltai- وسام الأوفياء
- عدد المساهمات : 64
تاريخ التسجيل : 20/07/2011
مواضيع مماثلة
» مجسم للكعبة فى السودان !!!!!
» أخبار السودان عام 2050م
» السودان .. أزمة إدارة
» حظر ختان الإناث في السودان
» الهمبتة والهمباتة في السودان
» أخبار السودان عام 2050م
» السودان .. أزمة إدارة
» حظر ختان الإناث في السودان
» الهمبتة والهمباتة في السودان
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى