الفراق المر

هذه القصيدة عمل خاص بالعبد لله ارجو من الاخوة الاعضاء إبدا رايهم بها دون مجاملة
هل يمكن له الاستمرار ام الكف عن المحاولات الشعرية مرة اخري
******************************************
الفراق المر
يبكيك والله يبكي ايامو الضاعت عبس بوراكي
مكتول بالاسف والحسرة القلب القبيل حباكي
*** *** ***

كان صادق معاك في حبو مابيتسلي غير ذكراكي
بي طول الزمن يا خاينة حافظ لي عهودو معاكي
الا اليوم فـقـد للالـــــفة ونبرات الحنان من فــــاكي
ساب دربك خلاص وتخلي فكر في البيلهي سواكي
*** *** ***
لاتفتكري يـــامخدوعة قلباً باكي مـنـك وشاكي
زي ريدو ومحبتو ليكي في باقي العمر تلقاكي
كان مخلص وفي لي حبو واكبر همو باقي رضاكي
الا الدنيا تـبـقي كـفـيـلة تـديهـو البـنـسي هـواكي
*** *** ***
انسي الكان بعزك ديمة في ساعة الغياب ولماكي
انسي الرقة انسي الريدة لحظات الوداع ولقاكي
يبقي تعــرفي انو الــريدة إحساسـاً نبيل جواكي
ما زي السلع مجلوبة في الاسواق دوام ترجاكي
*** *** ***
متأسف علي خطواتاً تاهت في الدروب قاصداكي
متأسف عـليهو قليبي ودر كـل عـمـرو وراكــي
قلباً كان بيحلم ديمة مـــع الايام يطولو علاكـي
الا خلاص نساك وحتي اصبح مابيطيق ذكراكي
*** *** ***
لاتـفـتكــري انــو حـيرجــع مـن بعــد الحصل يلقاكي
والله بـيـنـسي جــورك ليهو تــانــي يعـــود ويـتـسـناكي
فكري غيرو شوفي بديلو كان تنسندي تنسي شقاكي
لوتلقي البماثـل ريـدو اكيــد مابتلقــي ....أتـــحداكي