حركات بتجنن

جني وجن النسوان البمشن بيت البكاا وهن محننات ولابسين تياب الشفون والريحة لآخر الشارع خصوصا" انو فى الكوفير فى رسومات حنة تطلق عليها (رسمة بيت البكا)!!! دا كلام شنو؟

جني وجن راجل يتعامل مع المرأة على اساس الوش والجسم وخلف ذلك كلو غير مهم (خصوصا الرجل الشرقي) بالرغم فى الدول الأروبية تقيم المرأة على اساس الروح والتعامل وثقافتها !!

احنا شعب لا نحترم المواعيد سواء رجال أو نساء البقول ليك الساعة 12 ظهر معناتو تجيهو بعد ساعتين او تلاتة حسب توقيت قرينش مع (مراعاة فروق الوقت).!

عيد الحب باقي ليهو 25 يوم فقظ!! وبيصادف اعلان نتيجة الاستفتاء !! يعنى الخرطوم فى عيد الحب لن تستطيع ان تقدم هدية (دبدوب ) لجوبا!!

في مذيعات فى قناة الخرطوم بليدات وبستغرب كيف اجتازو امتحان المعلومات العامة والثقافة ..واحدة فيهن قالت إنو (المهر) هو ولد الأسد !!! ياخى أسد فى عيينك!

محاسن لقيمات (مغنية من الجيل الحديث) قالت بتخاف من الكديسة إنتى (فارة) ولا شنو؟

مع ذيادة الأسعار تم ذياتدة رطل خشب الصندل (الريحة البلدية) بقى بي (500 جنية) وعرس السنة دي مافى تب !!!

أكثر شىء متوفر فى السوق الايام دي (التفاح بالالوان-سم الفأر- شرائح الموباييل-نبق فارسي) والاسعار فى متناول الجميع –زمان كان التفاح من الرفاهيات حسة الحمد لله التفاحة بي 50 قرش!

بزعل جدا" لمن أشوف شاب /شابة لمن ينهرو جدهم او حبوبتوم لأنهم (خرفو) او بتهيىء ليهم بأنهم خرفو –عيب شديد ماتنسو انهم فى صغركم اكلوكم وحمموكم وادوكم قروش تشترو حلاوة من الدكان واحن عليكم من أمكم وأبوكم (بوس يدهم واديهم احترامهم حتى لو خرفو لأنك يوك حتخرف) صح؟!

تخيل تخت اعلان فى الجريدة خاص بيك ويضرب ليك شاب يقول عاوز يتعرف!!! دا يسموهو شنو (فراغ اجتماعي) ولا اسعار المكالمة بقى مخفض؟!

المواصلات بقت بي 60 قرش بعد الذيادات والناس عارفة كدا ليها اسبوع يبقى لزومو شنو تشاكلو الكمساري وتديهو كف لانو طالب بحق من حقوقو (الكمسارى موظف قطاع خاص) واجب عليك ان تحترمو لأنو دليل على التحضر واحترامك لذات ولمن حولك .!

زمان قولنا ليكم عرسو بي 25-30 مليون الكلام دا كتبتو فى السنة الفاتت اها السنة دي حصلت ذيادات وبعدين ماتجو تقولو ما نبهتكم .!

سوق بحري – الخضار هناك رخيص وشكلو جميل التحية والتحيات لناس الخضار فى سوق بحري .!

الما أكل من سمك عوضية فى امدرمان ..حقيقي ما أكل وسعرو فى متناول الناس لا غالي ولا رخيص ممكن نقول وسط ..وفيهو مكان للأسر والاطفال فى الشتاء دا السمك واجب وطني.

زواج رشا الرشيد المذيعة عمل ضجة فى السودان صور وكواريك والحفل الأسطوري وووو والله راسنا وجعنا – اكيد الاهتمام بيها موش لأنها مذيعة ذات افق واسع – مثقفة –وغيره بل لأنها جميلة الشكل ..(ولا عزاء للشينات) . ياجماعة ارحمونااااااااا !

كريمات تبيض الوش اصبحت فى شوارع الخرطوم تحت شعار (قدر ظروفك) المعلقة بي 2 جنية ايوة تخيلو بالمعلقة ومامعروف فيها شنو جمكسين سم فار ؟!! المهم انو مبيض للوش – يابنات سلختو وشوشكم والله الرجل السوداني بقى يعرف البياض الحقيقي من المزيف ما تتعبو روحكم !

اقتنعتا انو الفيس بوك وسيلة لضياع الزمن للونسة- تبادل معرفة- ممكن ثقافة- بكسر الروتين الممل- تعرف ناس مواسيير – تعرف ناس كويسة- تعرف ممثلين – شخصيات مهمة – ناس بتبيع مخدرات- قروبات للدعارة- تخلط بنت سمحة- والبنت تلقط عريس ذو مكانة مرموقة – تلعب فيهو لعبات –(لكن بمجرد ما الزول يرتبط يعرس او يخطب بشتت منو ) . يبقى مامنو فايدة !!

ليه الزول لمن يفقد حاجة من بيتو قروش او دهب أو أشياء قيمة بتهم الخدامة /الخدام (عذرا" لهذة الكلمة لأنها غير انسانية) وما بفكر فى أولادو ؟؟ هلى لأنهم أولادك ما ممكن يسرقوك؟!! قال تعالى: تعالى : " يا أيها الذين آمنوا إن من أزواجكم وأولادكم عدواً لكم فاحذروهم".

آخر التقليعات السماية بقو يحجزو ليها فى القاعات بفنان !!! ياحليل الجاب المطرة.!

العريس ادا العروس مهر وشيلة حوالي 100 مليون جنية !!! (لو عندى كان عملتا بيها مشروع) وسكن اهلا فى بيت جمبهم (عريس السرور) وجاب ليها لبن العصفور ..بعد 4 شهور عرس فلس وزيتو طلع قامت طلبت الطلاق!! (الآن هو رجل أعزب).!!

الايام دي موضة عرس البنات الكبار – اظنهم الرجال فترو من الدلع الكتيير والطلبات التقصف الظهر .!!

أغنية وردى تم تعديلها فأصبحت (كبرتي ليك 30 سنة).!!

فى امهات بتغظ منهم لأنهم بخلو شفوعم فى الشارع حفايا وبدون رقابة وفى النعاية تمشى القسم تفتح بلاغ (خطفو ولدي) ؟!! طيب دي مسئولية منو؟!!.

الترزي الجمب بيتنا قال عاوز يخلطني فى (حديقة حبيبي مفلس) صلحتا ليهو معلوماتو بإنو الحديقة بقت بقروش!!.

الاستحمام فى البرد غير مستحب فى بلدنا (والماصدق الحدثك) أركب المواصلات وانتا براك بتعرف!!

معقولة تطبعي كروت عرس بي 8 مليون ؟؟! لمتين البنات يبقو عاقلات ويعرفو وضع شبابنا كويس ؟!! يااخى دا عرس ولا قوم جاري !

لو ما لقيت وظيفة بمؤهلاتك ما تنتظر لمن تلقا اشتغل اي حاجة وجرب فرصتك فى عمل تاني يكون قريب لقلبك يجوز الخير فى الشغل الجديد دا ..وقروشو تبقى أحسن والسوق واسع جرب حظك وما تيأس كل زول بياخد رزقو ..ماتنتظر ابوك يديك ولا أمك تصرف عليك – خليك راجل واتحمل مسئولية نفسك!!

لنساء السودان الطموح مهم فى حياتنا اشتغلى وكافحي وساعدي نفسك قبال اهلك لمي قريشاتك للمستقبل – ماتنتظري العريس لمن يطرق بابك يمكن تقعدي لحدى ال40 وماتتزوجي هل معناتو الحياة انتهت؟ لأ حققي كيانك وواصلي مسيرتك ربنا مابنساكي.


الايام دي فى موضة جديدة من قبل الرجال – بمشى يطلب البنت من اهلا عشان تثق فيهو بالكامل وبعد ما يزهج منها يفكها عكس الهواء ويطلع لا هو فلان ولا عاوز يعرس ولا شىء ومنتحل اسم زول تاني !! شىء مؤسف!!

موضة غش البنات برضو تخلى الولد يخطبا وتشيل الدهب والحاجات الجابا ليها وتعرس بيها زول تاني كانت بتحبو بالدس!! لا حول الله !!




نقطة أخيرة:

كلنا بنحلم بواقع جميل وممكن واقعنا يخذلنا لكن!! كل شىء بيتحقق بايدينا نحن يا انت تبقى سعيد يا انت تبقى تعيس .. قدرتك على تحمل المصائب .. حدد امكانياتك ..ومسئولياتك تجاه بيتك او بيت أسرتك ..أشرك فتاة أحلامك معاك فى افكارك خليها تساعدك انشاءالله معنويا" ..السعادة مافى القرش بس السعادة فى راحة البال
واحنا برضو كآنسات مطالبات بالوقوف بجاانبك حتى نحقق ما نتمناة (والبركة فى الشباب).


أسفة لطول الكلام ..واتمنى ليكم سنة بخيتة عليكم

شكرا" لحسن صبركم
((منقول من الفيس بوك))